Paano Ako Nagsimula sa Industriya ng Manok-Pansabong

196

Noong August 2011 ako natanggap sa trabaho bilang associate editor ng Pit Games Magazine.

Naaalala ko pa noong tinanggap ko ang hamon na “24-hour job.”

Tumayo siya at iniabot ang kanyang kamay sabay sabi, “Congratulations, you’re hired!” Ako’y nagpasalamat sabay ngiti at nasabi ko sa aking sarili, “Ano ba itong napasok ko?”

Hindi naging madali sa umpisa. Konti lang kasi ang kaalaman ko tungkol sa manok-pansabong at sabong.

Ngunit lumaki ako sa pamilyang mahilig sa manok-pansabong.

Ang aking tatay at mga kuya ay nag-aalaga ng manok-pansabong, ngunit hindi ako nakikialam sa mga ginagawa nila sa kanilang mga alaga sa pagpapatuka man o sa pagpapainom.

Ayaw din lang naman kasi nila akong isama sa sabungan dahil ang sabi nila ang sabong ay isang uri ng sugal.

Mas makakabuting ako raw ay tumutok na lang sa aking pag-aaral.

Ang tanging madalas kong hawakan ay mga libro mula kindergarten hanggang sa nakapagtapos ako ng kursong Bachelor of Philosophy at napadaan sa law school.

Nang makapagtapos ako sa kolehiyo, doon pa lamang ako nagkaroon ng pagkakataon na makapagpunta sa sabungan kapag ako’y yayayain ng aking mga kaibigan tuwing kapistahan ng aming bayan.

Hindi ko pinangarap pasukin ang industriya ng manok-pansabong ngunit ang trabaho ko ay umiikot na dito at siya namang aking ipinagpapasalamat.

Ako ay naging associate publisher ng Harimanok Magasin. Dati rin akong associate editor ng Pit Games at Farmbook Magazine, at dating editor ng The Global Pigeon Fancier Magazine.

Ako rin ang may-ari ng The Sabong Chronicles na aking itinatag noong 2014 at naging editor-in-chief ng Teksas Libre! Magazine.

Ang nakakatuwang bahagi ng aking trabaho ay ang makasalamuha ang iba’t ibang taong nahihilig din sa manok-pansabong. Kahit magdamagang kwentuhan basta ang pinag-uusapan ay manok-pansabong.

Marahil may mga taong ang tingin sa sabong ay sugal lamang at masamang bisyo kung ituring.

Ngunit sa isang dako ay may mga kwentong talaga namang huhugutan mo ng inspirasyon.

Mahilig ka rin ba sa manok-pansabong?

Bakit?

Share your thoughts in the comments.